كريم عبدالعزيز في مغامره عالميه بفيلم المشروع X المنتظر بشده قريبا
طرحت شركة “سينرجي” أول برومو تشويقي لفيلم “المشروع X” للنجم كريم عبد العزيز، وده استعداد لعرضه في السينما خلال شهر مايو اللي جاي، وسط ترقب كبير من الجمهور.
البرومو كشف إن الفيلم بيجمع بين أكشن ومغامرات في أكتر من مكان، من صحرا مصر للهرم، وبعدها لدول تانيه تحت الميه كمان!، وكريم بيجسد شخصية اتفصلت من كلية الآثار، وبيتورط في مهمه خطيره جدًا.
ظهر إياد نصار في مشهد وهو بيكلم عن “الغرفه السريه في الهرم الأكبر”، بعدها نسمع صوت كريم بيقول جمله منقوشه على مقبرة توت عنخ آمون: “سيضرب الموت بجناحيه السامين كل من يُعكر صفو الملك”.
اللقطات كانت مليانه أكشن وضرب على الطيارات وتحت الميه، وفي مشاهد لغواصين بيلاقوا حطام قديم، اللي واضح إنه هيكون جزء مهم من القصه.
كمان ظهر في البرومو نجوم كتير زي ياسمين صبري، هنا الزاهد، ماجد الكدواني، أحمد غزي وعصام السقا، والفيلم من تأليف وإخراج بيتر ميمي، وإنتاج تامر مرسي.
واضح إننا قدام فيلم تقيل هيكسر الدنيا في الصيف!
