ماركوس تورام اختار إنتر ورفض باريس.. وده كان السبب الحقيقي
الليلة دي كل العيون على ماركوس تورام، المهاجم الفرنسي الطائر، اللي هيكون واحد من نجوم السهرة الكروية بين إنتر ميلان وباريس سان جيرمان في نهائي دوري أبطال أوروبا.
تورام انضم لإنتر ميلان في صيف 2023، بس اللي كتير ميعرفهوش إن اللاعب كان على وشك يلبس قميص باريس سان جيرمان، بعد مفاوضات قوية من النادي الفرنسي ورغم الإغراءات، قرر تورام يلف ويمشي على إيطاليا بدل ما يرجع لبلده!
صحيفة “لو باريزيان” كشفت السر، وقالت إن تورام بنفسه صرح إنه اختار إنتر لأنه ضمن إنه هيلعب في مركز رأس الحربة، مش جناح زي ما كان باريس عايز.
كمان شايف إن الإنتر وقتها كان في وضعية أحسن، خصوصًا إنه كان طالع من موسم قوي ووصل نهائي دوري الأبطال، على عكس باريس اللي كان بيغير مدرب ولاعيبة وبيمر بفترة عدم استقرار.
النهاردة تورام عنده فرصة يثبت إنه أخد القرار الصح، لما ينزل ويواجه الفريق اللي كان ممكن يبقى فريقه وهل هيكون نجم النهائي؟ كلنا مستنيين!
