محمد السباعي يوضح موقفه من الصحفيين بعد اللي حصل في جنازة سليمان
أصدر الفنان محمد السباعي بيان رسمي على صفحته بالفيسبوك، علشان يوضح فيه موقفه بعد الهجوم اللي حصل منه هو ومراته الفنانة آية سماحه على الصحفيين والمصورين أثناء جنازة الفنان الراحل سليمان عيد.
السباعي كتب: “إن للموت جلاله وحرمه، وفي فرق كبير بين نقل الخبر وبين انتهاك حرمة الموتى، وفرق كمان بين تقديم التعازي وبين إنك تنتهك خصوصية أهل المتوفي”.
أكد إنه بيحترم كل الصحفيين والمصورين في مصر والعالم العربي، وإن أغلبهم أصدقاء أو قرايب ليه، لكن اللي حصل مؤخراً في الجنازات والعزاءات كان تعدي على كل التقاليد والاحترام، وده اللي خلاه يعبر عن غضبه بالطريقه اللي حصلت.
أما الفنانة آية سماحة، فكتبت على فيسبوك: “كل التقدير والاحترام لكل صحفيين ومصوري مصر المحترمين، ومفيش أي نيه للإساءة لأي حد”.
الجدير بالذكر إن الفنان الراحل سليمان عيد اتوفى بعد أزمة قلبيه مفاجئة، واتنقل المستشفى لكنه فارق الحياة في عربية الإسعاف، وتمت صلاة الجنازة يوم الجمعه 18 إبريل واندفن في مدافن العيلة.
