ديسير دو يسجل الهدف التاني وباريس يولّع النهائي في ميونخ
النهائي اشتعل بدري جداً! ديسير دو نجم باريس سان جيرمان سجل الهدف التاني لفريقه قدام إنتر ميلان في الدقيقة 20، بعد تمريرة سحرية من عثمان ديمبيلي، قابلها بلمسة فنية من جوه منطقة الجزاء حطّها في الشباك بكل ثقة.
الليلة دي شكلها مش عادية أبدًا في أليانز أرينا بمدينة ميونخ، واللي بتستضيف للمرة الرابعة نهائي دوري أبطال أوروبا والأجواء مجنونة، والحماس في كل زاوية من الملعب، وجمهور باريس عايش حلم التتويج لأول مرة.
باريس دخل اللقاء بتركيز عالي، ونجح يسجل هدفين في أول 20 دقيقة، الأول كان عن طريق أشرف حكيمي، والتاني دلوقتي عن طريق ديسير، وسط توهان واضح من دفاع الإنتر اللي لسه مش فاهم إيه اللي بيحصل.
الطريق للنهائي ماكنش سهل، باريس تخطى آرسنال بثلاثة أهداف مقابل هدف في نصف النهائي، أما الإنتر فجاب العيد ببرشلونة وتفوّق عليه 7-6 في مجموع الذهاب والإياب.
بس كل ده خلاص اتحط ورا الظهر، دلوقتي كل الأنظار على 90 دقيقة من نار.. وباريس حاليًا هو اللي ماسك زمام الأمور.
