ديسير دو يسجل التالت وباريس بيقرّب من حلم دوري الأبطال
الفرحة باريسية خالصة في نهائي دوري أبطال أوروبا اللي شغال دلوقتي في ملعب “أليانز أرينا” بمدينة ميونخ، بعد ما ديسير دو سجّل الهدف التالت لفريقه باريس سان جيرمان قدّام إنتر ميلان في الدقيقة 63 من عمر المباراة.
الهدف جه بعد تمريرة حاسمة جديدة من النجم عثمان ديمبيلي، اللي حرفيًا موزّع سحر طول اللقاء، واستلمها ديسير جوه منطقة الجزاء وسجّلها بلمسة هادية حطّت الكرة في الشباك بطريقة متقنة، وسط ذهول من دفاع الإنتر اللي ضايع ومش قادر يلم نفسه.
باريس بيلعب بثقة وهدوء كبير، والماتش ماشي لصالحه تمامًا، وأداء لاعبيه بيقول إنهم عايزين ينهوا القصة من دلوقتي ,هدف ديسير دو هو التاني ليه في المباراة، وده بيأكد إنه نجم الليلة بلا منازع بجانب ديمبيلي.
الجمهور الباريسي بيعيش ليلة تاريخية، خصوصًا بعد السنين الطويلة اللي الفريق كان بيحاول فيها يوصل للنهائي ويحقق اللقب ودي المرة التانية بس اللي باريس يوصل فيها للنهائي، والأقرب دلوقتي إنه ياخد البطولة لأول مرة في تاريخه.
الإنتر من ناحيته، رغم المشوار الناري اللي خاضه وإقصائه لبرشلونة من نصف النهائي، لكن واضح إنه منهار تمامًا النهاردة ومش قادر يرد.
فهل باريس هيكمّل العرض الكبير ويختمها باللقب الأغلى؟ ولا الإنتر عنده كلام تاني في الدقايق اللي جاية؟
