انطلاق مؤتمر الدراما المصريه بمشاركه نجوم وفنانين كبار وسؤال مهم
بدأت أولى جلسات مؤتمر الدراما المصريه فين وإلى فين بمشاركه عدد من نجوم الفن وصنّاع الدراما، زي محمود حميده، وأشرف عبد الباقي، وهاني رمزي، والمؤلف مدحت العدل، والمخرج محمد فاضل، وادار الحوار المخرج عمرو عابدين، رئيس قناة نايل سينما.
المخرج محمد فاضل قال في كلمته إن ماسبيرو زمان كان ليه دور كبير في صناعة الدراما، لحد سنين قريبه زي 2010 و2011، وأشاد بالشركة المتحده على شغلها القوي في رمضان، وذكر أعمال زي جودر ولام شمسيه وولاد الشمس وقال إنها من جيده جدًا لـممتازه
وأضاف إن لازم نرجّع ماسبيرو يبقى جزء من الصناعه من تاني، وأكد إن أهم حاجه في أي عمل درامي هو وجود مخرج كويس وسيناريو محترم، وشكر الجيل الجديد من الكتّاب والمخرجين.
اما محمود حميده، فطرح نقطه مهمه، وقال إن فيه ناس بتخلط بين تطوير الدراما وتطوير التليفزيون، وسأل احنا جايين نطوّر محتوى ولا نعمل تلفزيون ووضح إن التلفزيون جهاز خدمي مش مفروض يعلن عن دخله.
وختم كلامه بإن لازم نعيد هيكله القوانين ونشوف أسباب مشاكلنا مش بس أعراضها.
