الطقس من يوم الاربع لحد الاتنين.. حر وانخفاض وتقلبات فـ الجو
كشفت هيئة الأرصاد الجويه عن حالة الطقس اللى هتبدأ من يوم الاربع 23 ابريل لحد يوم الاتنين 28 ابريل 2025، وقالت إن فى تقلبات واضحه فى الجو والناس لازم تاخد بالها.
يوم الاربع بيبدأ بانخفاض تدريجى فى درجات الحراره من شمال مصر لحد القاهره الكبرى، وهيكون الجو حر شويه على القاهره والوجه البحرى، ومعتدل عالسواحل الغربيه، وسخن جدًا على جنوب سينا وجنوب مصر بالليل الجو هيكون معتدل ف اغلب المناطق.
كمان الرياح هتنشط خصوصًا على السواحل الشماليه وشمال الصعيد، وممكن تشيل تراب ورمله على سيناء، وده هيكون فـ فترات متقطعه.
وبداية من الخميس 24 ابريل، هيحصل انخفاض تانى فى درجات الحراره على أغلب الانحاء، ما بين 4 لـ 7 درجات. القاهره هتوصل فيها الحراره لـ 28 أو 29 درجه، والسواحل لـ 23 أو 24، وجنوب مصر ممكن تنزل من 43 لـ 31 درجه.
الفتره من الخميس لحد الاتنين، الرياح هتفضل تنشط على مناطق من جنوب سينا وجنوب مصر، بردو بشكل متقطع.
درجات الحراره المتوقعه انهارده الاربع كانت كالتالى:
القاهره العظمى 35 والصغرى 20،
اسكندريه 24 / 17،
مطروح 23 / 16،
سوهاج 42 / 23،
قنا 43 / 27،
اسوان 44 / 28.
الناس اللى نازله من بيوتها تتاكد إنهم لابسين مناسب عشان الجو متقلب، ويستعدوا للأتربه فـ الجو.
