يوفنتوس يواصل السقوط وبارما يحقق فوز مهم في الدوري الايطالي
خسر يوفنتوس من بارما بهدف وحيد في مباراة الجولة الـ33 من الدوري الإيطالي، اللي اتلعبت على ملعب بارما وسط أداء باهت من فريق السيدة العجوز، واللي واضح إنه فقد البوصله في آخر مراحل الموسم.
بارما قدر يخطف الهدف الوحيد في المباراة عن طريق لاعبه ماتيو بيليغيرينو، واللي سجل في الدقيقة الأولى من الوقت بدل الضايع من الشوط الأول، بعد ما استغل خطأ دفاعي قاتل من لاعبي يوفنتوس، لينهي الشوط الأول بهدف يتيم كان كفايه يحسم بيه النتيجة.
يوفنتوس حاول يرجع في الشوط التاني، بس من غير أي فعالية حقيقية، رغم التغييرات اللي عملها المدرب، لكن الهجمات كانت عشوائية ومافيش تركيز في إنهاء الهجمات، وكأن الفريق داخل اللقاء من غير روح.
بالخسارة دي، يوفنتوس بيوقف رصيده عند 59 نقطة في المركز الخامس، وبيتعقد موقفه في المنافسه على مقعد بدوري الأبطال الموسم الجاي. أما بارما، فرفع رصيده لـ31 نقطة وخرج مؤقتًا من منطقة الخطر، وبيحاول يضمن البقاء بين الكبار قبل نهاية الموسم.
الوضع مايطمنش في تورينو، والضغط بيزيد على الإدارة والجهاز الفني.
