فينيسيوس خلاص قرب يمدد عقده مع ريال مدريد لحد 2030
يبدو إن قصة الحب بين ريال مدريد والنجم البرازيلي فينيسيوس جونيور هتستمر لفترة أطول، بعد ما وصلت مفاوضات تجديد عقده لمراحل متقدمه جدًا، وبقت قريبه من الحسم بشكل رسمي قبل نهاية الموسم.
صحيفة “ماركا” الإسبانية قالت إن فيه تناغم كبير بين الطرفين، وإدارة النادي عندها ثقه كبيرة في فيني وبتعتبره من أعمدة المشروع الجديد للسنين الجايه، عشان كده العقد الجديد ممكن يمتد لحد سنة 2030.
فينيسيوس نفسه طلع في مقابله مع قناة النادي وأكد إنه ناوي يكمل في الريال، وقال إنه واصل للي هو فيه دلوقتي بعد مجهود وتضحيات كتيره، وشكر المدربين والرئيس وزمايله على الدعم الكبير اللي بيقدموه له.
الجماهير المدريدية كانت متخوفه من إن فينيسيوس يرحل في المستقبل، خصوصًا مع العروض اللي كانت بتجيله، بس دلوقتي الأمور شكلها ماشية في السليم، واللاعب باين عليه مستقر ومبسوط في مدريد.
الكل مستني الإعلان الرسمي، واللي ممكن يحصل في أي لحظه، وساعتها هنشوف فينيسيوس بقميص الريال لسنين طويله جاية.
