ريال مدريد بيجهز لموقعة الكأس ضد برشلونه وسط قلق من الغيابات
ريال مدريد بيكمل تحضيراته للنهائي المنتظر ضد برشلونه في نهائي كاس ملك اسبانيا اللي هيتلعب يوم السبت الجاي، بس فيه قلق كبير حوالين مشاركة كيليان مبابي وفيرلاند ميندي اللي لسه موقفهم مش واضح.
في المؤتمر الصحفي قبل ماتش خيتافي، كارلو انشيلوتي مدرب الريال قال بصراحه إن الاتنين مش هيكونو جاهزين لماتش الاربع، بس عنده أمل كبير إنهم يلحقو الكلاسيكو الكبير يوم السبت.
الفحوصات اللي عملها الجهاز الطبي للريال بينت إن مبابي حالته بتحسن وممكن يكون جاهز قبل ميندي، اللي لسه بدنيا مش تمام عشان غايب من فتره طويله ومحتاج وقت يرجع فيه للياقته.
دلوقتي الكل مستني قرار انشيلوتي، هل هيجازف ويشرك ميندي في النهائي؟ خصوصا إن عنده بدائل زي فران غارسيا، ديفيد الابا، وكمان كامافينغا اللي ممكن يغطي مركز الظهير لو احتاج.
ريال مدريد بيحاول يكون في أفضل حالاته قبل الماتش الكبير، خصوصا مع رغبتهم في حصد البطوله دي قدام الغريم التقليدي، والجماهير متحمسه ومستنيه الاخبار السعيده من العياده.
