ملعب لاكارتوخا يجهز للكلاسيكو بعد تجديد ضخم قبل المونديال
السبت الجاي 26 إبريل، ملعب لاكارتوخا في إشبيليه هيكون على موعد مع نهائي ناري بين ريال مدريد وبرشلونه في نهائي كاس ملك إسبانيا، بعد ما خلصت أعمال تطوير وتجديد كبيره عليه، ضمن استعداداته لكأس العالم 2030.
الملعب اتغير شكله تماماً، وشالوا مضمار الجري اللي كان داير حوالين الملعب، وده خلى المدرجات قريبه من اللعب، وده هيخلي الأجواء حماسيه أكتر للجماهير.
كمان، زودوا عدد المقاعد لـ 70 ألف بعد ما ضافوا 12 ألف مقعد جديد في المدرجات اللي تحت.
كمان جددوا حاجات كتير زي غرف الملابس، والحمامات، ونفق اللاعبين، وحتى سقف الملعب اتجدد.
كمان، فرشوا النجيلة بنوع جديد فاخر عشان تكون تجربة اللعب على أعلى مستوى، خصوصاً إن الملعب ده هيستضيف مباريات للمنتخب الإسباني كمان.
الملعب أخد إشاده كبيره من كل الناس، من جمهور الريال والبارسا، وكمان من إدارات الناديين، اللي انبهروا بالشكل الجديد قبل الكلاسيكو المنتظر.
والكل شايف إن لاكارتوخا بقى جاهز يستضيف بطولات عالميه بكل جداره.
