ريم مصطفى بتحكي عن تجربه حب توكسيك خدت منها سنين عمرها
كشفت الفنانه ريم مصطفى عن تفاصيل علاقه عاطفيه “توكسيك” عاشتها سنين، وقالت في لقائها مع منى الشاذلي في برنامج “معكم” على قناة ON، إن العلاقه كانت صعبه جدا ومش مع أبو ولادها، لكنها استهلكت منها وقت ومجهود كبير.
ريم قالت: “أنا ممكن أكتب كتاب عن العلاقات التوكسيك، مريت بتجربه صعبه جدا مع شخص نرجسي، فضلت وقت طويل جدا وأنا عارفه إن العلاقه دي مش صح، بس مكنتش قادره أخرج”.
وأكدت إن الشخص اللي كان معاها مكانش واثق في نفسه، وده بيخليه دايمًا يشك فيها ويتهمها بحاجات مش فيها، وقالت: “كنت طول الوقت ببرر ومش بعيش”.
عن طريقه خروجها من التجربه، قالت: “الحمد لله إني ست شغاله وناجحه، لو مكنتش كده كنت هتوه في العلاقه دي”.
واختتمت كلامها وقالت إنها دلوقتي بقت رافضه أي علاقه مؤقته أو فاشله، وقالت: “أنا مش دكتور نفسي، لو مش هتضيفلي سعادة يبقى خليك في حالك، أنا مرتاحه كده”.
ويُذكر إن آخر أعمال ريم كان مسلسل “سيد الناس” في رمضان اللي فات.
