خناقة جديدة بين ويجز ومروان بابلو والجمهور بين مؤيد ومعارض
اتجددت خناقة نجوم الراب ويجز ومروان بابلو الأيام اللي فاتت، واللي كانت منافسه فنيه، بس اتحولت لصراع علني مولع السوشيال ميديا بداية الموضوع كانت لما مروان بابلو نزل أغنية بونو والناس فسروها إنها رسالة لويجز.
ماسكتش ويجز ورد بأغنيته الوعد ورجع فيها لستايله القديم بالكلام الحاد والمزيكا الجامدة، بالتعاون مع المنتج راشد، واللي فكر الناس بأيام الراب الشعبي بتاع ويجز زمان.
الخلاف مش جديد، ده كان في سبتمبر اللي فات لما بابلو نزل ستوري لابس ستريت ستايل في الإمارات، بعدها بساعات ويجز ظهر بلوك شبهه في حفله بالعلمين، وبدأت الشكوك إنه بيقلده.
بابلو زود النار ونزل ستوري لست لابسه تيشيرت مكتوب عليه حتى مش بتعملها صح بطل تقلدني وويجز ساعتها رد بسلسلة ستوريز وقال إن بابلو نفسه بيقلد ترافيس سكوت وكانيه ويست.
وزودها كمان ويجز لما اقتبس جملة لبيكاسو الفنانين الكويسين بيستعيروا، العظماء بيسرقوا في محاولة إنه يبرر الهاماته، بس الناس شافوا فيها تحدي مباشر لبابلو.
الجمهور اتقسم، ناس مع ويجز وابداعه، وناس شايفين التقليد زاد عن حده، وسط جدل كبير حوالين حدود الإلهام في الفن دلوقتي.
